रात्रीला पंख फुटले
अन् ती गेली उडून
दिवस बिचारा काम करून
गेला थकून भागून
शोधू कुठं अन जाऊ कसं?
ही अर्धवट नोकरी सोडून
विचार करुनी वेडा झाला
मग्न गेला बुडून
वैनतेया सांगे विनवून
आणण्यास कामिनी शोधून
खगराज चहू भ्रमण करुनि
आला निरोप घेऊन
गरोदर आहे यामिनी
तात झालात म्हणून
गळून पार अर्धा झाला
जमीन गेली सरकून
कोण देईल सुट्टी मजला?
कोण करेल तिचे काम?
उडणारा बोजवारा आठवून
लावू लागला बाम
शिस्तीत नोकरी केली असती
तर नसते लागले माझे
नको तिकडे ध्यान दिले
आता उचला दोघांचेहि ओझे
